نزعل ونتكبر
نزعل ونتكبر وحنا من الطين
والكل منا صد لا اقبل خويه
نفخر نقول انا على الصد قاوين
وهي علينا في الحقيقه قويه
نشفق على الطيبه وكسب الكريمين
وهذي بنا لاشك فعله رديه
ننسى نهايتنا وعلى وين ماشين
وننسى الزمان اللي جمعنا سويه
المشكله ماهي بحاجه لتخمين
ولاهي بعد ياناس صعبه القضيه
دق الرقم كيفك هلا فيك واهلين
انا الخوي اللي مزعل خويه
قله تغيب وصورتك داخل العين
ويبقى لحبك في خفوقي بقيه
اخوان حنا لو يجي بيننا شين
وما تفترق دام المحبه نديه
خلك قوي لاتحتكرك الشياطين
قبل الفوات وقبل وقت المنيه
كلم خويك باطيب الهرج واللين
واعرف جميل الهرج يمسح رديه
هذي هي الدنيا من الحين للحين
لابد بين الناس تحصل خطيه
ومن ما يقدر غلطة احبابه الحين
يقرا حروفي ويعتبرها هديه
باكر تمر سنين وسنين وسنين
والكل يرحل في الدروب المديه
صدقني تندم واذكر حروفي زين
تندم على خلك اذا غاب ضيه
دنيا غريبه واكثر الناس ماشين
وكم صاحب والله دفنته بديه
تحياتي
|