من أشعارهــ ...
ياصاحبي
ياصاحبي هانـت عليـك المحبـه
لاوحسايف عقب هاك المواثيـق
جمر الغضا في وسط قلبي تشبـه
نارٍ حطبهـا يابسـات المعاليـق
كـاسٍ مليتـه بالـوفـا لاتكـبـه
خلّه يبلل بالوصل يابس الريـق
صبّـه بقلبـي ثـم ملّـه وصبّـه
وان كان ودك غرق القلب تغريق
دام الهوى راسي وراسـك يهبـه
خذ سجّةٍ ترى زمانـك توافيـق
ترى حلاة العمر مـع مـن تحبـه
شخص تريد من جميع المخاليق
*****
فدوة عيونك
فدوة عيونك لو غدت روح مغليك
وش عاد لو راحت لعينك عشاير
أبيع مايغلى على الكون واشريك
واسوق لى جتني علومك بشاير
وازعل جميع الناس بالحيل وارضيك
واصبر لو دارت علي الدواير
واخذ من ايامي لك ايام واعطيك
وان راح عمري لك فلا هو خساير
أحب أنا شوفك وصوتك وطاريك
دايم وفكري فيك هايم وحاير
بالصمت أهوجسبك وبالصوت أناديك
والله عليم البينة والسراير
أنا وقلبي والهوا بن أياديك
عندك مفاتيح الهنا لضماير
من روحي أحبك ومن روحي أفديك
يامن غرامة والحسن فيه ثاير
*****
يا شروق الشمس من عقب المطر
يرتعش مثل الذهب فوق الغدير
يا صباح العمر طاولت السهر
في رجا الله ثم جذّاب النظير
ليلتي عقبك تشوّق للقمر
ما تعوض نجومها لو هي كثير
كل ما روّحت فكري و النظر
عوّد الخاطر على قلبي كسير
انت لي مثل المسيله للشجر
و انت ورد العمر يا نفح العبير
إن حضرت اغلى مطاليبي حضر
و إن رحلت القلب نهّض للمطير
من عرفتك ماتذكّرت الحذر
بايعٍ عمري على حدٍ شطير
شوفتي لك هي مطاليع الخطر
وش عقب عينك على العاشق خطير