ابد ماجيت ابارك لك ولكن جيت ابا أوصيـك
// على اللي ناوي(ن) تدخل بها الليلـه .معذبتـي

ترى لولا الظروف الي عطتك وحدت محاكيك
// قسم بالله ماتدخل عليهـا لـو علـى رقبتـي

ولكن النصيب اقوى ولا ادري ويش اسوي فيك
// نعم صارت معزبتـك ولاصـارت معزبتـي

كذا صارت لي القسمة بتحرمني لأجل تعطيـك
// كذا لازم عشان تفوز انت انا اخسر بتجربتـي

تراهـا غاليـه جـدا وتكفـى والله يخلـيـك
// تدللها..تدلعها..تنسـيـهـا مصـاحـبـتـي

انا من كثر مااغليها احس اني بديـت اغليـك
// ولا تسـأل بايـة حـق والا وش مناسبـتـي

لانك لو بتسألنـي بتسمـع شـي مايرضيـك
// لـذا ياخـوي لاتسـأل ولاتسمـع لأجوبتـي

ابيك تحطها في داخل عيونـك وبيـن ايديـك
// وهي دلوعه اعتادت علـى كثـرة مداعبتـي

فداعبها شوي شوي حتـى تشتهـي طاريـك
// وشاغبها الين تقـول بطـل مـن مشاغبتـي

واذا هي مالها خلقك ولاتضحـك ولا تسليـك
// تحملهـا واسألهـا ياعمـري ليـه عصبتـي؟

وبالك اسمع انك يوم تضربها وهـي تشكيـك
// مايحتاج اوري لك بفـن الضـرب موهبتـي

صحيح انك بتملكها ومعـاك العقـد بالتمليـك
// وانا عارف حدود الله ومـن حقـك معاقبتـي

ولكن قل لها المجنون وصانـي وهـو يعنيـك
// يقول انـه بينتظـرك ولـو شيـب وشيبتـي

وانا مجنونها الي مانساهـا وانـت مايمديـك
// تغطي ذكرياتي فـي هواهـا ربـع تجربتـي

احس اني تماديت بكلامي والغضـب حاديـك
// لوانك فـي مكانـي ماتفكـر فـي محاسبتـي

كفاك اني تركت الليله اشغالي عشـان اجيـك
// دخلت القاعه برجلي ولاادري ويـش عاقبتـي

وانا ماجيت اخرب عرسـك الليلـه ولاآذيـك
// اناجيتك عشان اخاطبـك واسمـع مخاطبتـي

توصى وانتبه واحـرص عليهـا والله يهنيـك
// ترى كل الكلام الي طلع من ضيقـي وكبتـي

ولكن ماقدرت انـي اقولـه وانـت مايخفيـك
// اخاف اني اذا قلـت تقـوم وتقطـع رقبتـي


للشاعر / محمد الشهري..