حيرتني واحترت
حيرتني واحترت .. وش هي نواياك
كل ما نسيتك جيت تعلن خضوعك
عجزت لفهم بالهوى كيف مبداك
طبعك غريب ونادر الناس نوعك
مره تجيني قاطع حدود دنياك
تسبق معاذير البطاء لي دموعـك
في لهفه منها الوله جاوز اخطاك
وكن الغلا مستل سيفه يلوعـك
ومره احس ان الغلا من بقاياك
ما ضمته بين الحنايا ضلوعـك
صار الغياب اليوم ابرز مزاياك
واول غيابك ما يكّمل سبوعـك
قلي امانه ريّح البال وش جاك
لا تنطفي بالحب اخر شموعـك
عطني عهودك بالوفاء هات يمناك
واللي بغيته بالمعاليق طوعـك
رهنت شوقي بايع الناس لرضاك
وانهد حيلي من غرايب طبوعـك
ابيك تبقى داخل العين ترعاك
لو طحت يصعب في المحبه طلوعـك
مليت صبري اشتكي منك وانهاك
يالله عسى ما صابني ما يروعـك
هذي حروفي نزفها من سواياك
ترجمتها باحساس ياصل سموعـك
اخاف يومٍ ما يجي فيه طرياك
وان جيت ترجع ما يسّرك رجوعـك
تقبلوا ودي
|